豐田宣布委任四屆世界越野錦標賽（WRC）總冠軍馬健侖（Tommi Makinen），出任豐田WRC車隊總監，而豐田汽車社長豐田章男（Akio Toyoda）則出任車隊主席。

將於2017年重返世界越野錦標賽（WRC）嘅豐田車隊 ，屆時將會以Gazoo Racing名義參賽，Gazoo屬豐田旗下汽車網站，約在1999年開始運作，當時嘅Gazoo.com網站主腦就係豐田章男。

豐田章男（左）馬健侖（Tommi Makinen，右）

豐田章男對豐田以廠隊姿態重返WRC寄予厚望，親自督師

馬健侖今年51歲，芬蘭出生，喺1996、1997、1998、1999年四度取得WRC世界冠軍，佢由1985年開始越野賽生涯，先後24次取得WRC回合冠軍，佢先後效力過日產WRC車隊（Pulsar GTi-R年代）、三菱，2002年轉投富士（Subaru）車隊，2003年賽季完結後，開設以Tommi Makinen命名嘅賽車駕駛學校，而家連豐田都撈埋，真係吃得開。

馬健侖自告別WRC以後，開設以其命名嘅賽車駕駛學校，並為富士（Subaru）開發新車

據豐田章男喺豐田聘任馬健侖嘅新聞稿表示，佢喺2013年認識馬健侖（Tommi Makinen），當時馬健侖係佢嘅賽車駕駛導師，又話幫佢改善駕駛技術，亦到令佢明白越野賽車同汽車開發嘅關係。豐田章男大讚馬健侖擁有豐富嘅汽車研發經驗，去年先後喺多個國際賽車活動亮相嘅四驅Turbo版豐田86，就係馬健侖出品，聞說豐田章男十分欣賞呢部「一次過」四驅車，兩人嘅工作關係愈趨緊密，今馬健侖出任WRC車隊總監，豐田章男擔任車隊主席，擺到明老闆射住，掂掂掂。

唯一一部四驅Turbo版豐田86

馬健侖親自落手測試豐田Yaris WRC賽車

馬健侖最早效力嘅日本廠隊，唔係三菱，而係日產，當時嘅賽車係Pulsar GTi-R，又稱Sunny GTi-R

究竟由車手變車隊總監掂唔掂？咁由球員變教練或球隊總監又ok唔ok？數由車手變身為出色車隊總監嘅，必定係現任國際賽車聯盟（FIA）主席托特（Jean Todt），佢喺七十年代只係越野副車手（領航員），八十年代統領標緻（Peugeot）WRC車隊，之後更成為法拉利F1車隊總監。

為慶祝三菱喺WRC取得四連冠，廠方喺1999年發表Lancer Evolution VI Tommi Makinen Edition，

香港車迷又稱之為「六代半」。

咦！七代都關你事？