多咗人玩電單車是事實，原因可能係電單車外形愈來愈靚，例如Vespa嘅綿羊仔，retro、夠cute之餘亦好精緻，而且，養電單車皮費比養「四個轆」划算好多，反正冇諗住日日揸車番工，咁玩電單車都好合理，有部車，出去鬆吓，好過放工同放假焗住屈喺嗰幾百呎地方。

不過，好老實，電單車冇冷氣，天氣熱，揸出街大塵又黐立立，好多奄尖聲悶要求多多嘅巴打或姊妹都頂唔順，不自覺將電單車睇低一級、兩級，甚至三幾級。咁冇辦法啦，夜晚或者天氣涼啲先揸囉。

意大利Piaggio旗下嘅Vespa綿羊仔，通街都有，售價亦好易負擔。咁總有人不甘於普通版嘅設定，包括車廠。最近Giorgio Armani同Vespa推出聯乘新項目，係稱為Vespa 946 Emporio Armani特別版。兩大品牌有此合作，因為話Giorgio Armani今年40周年，而Vespa又咁啱130周年喎，啱嘅，總有佢哋嘅理由。

Piaggio主席兼CEO Roberto Colaninno（左）與Giorgio Armani（右）

[Youtube]https://youtu.be/CeO2AebSSnw[/Youtube]

同 Armani扯得上關係，點都要有啲實在升級，例如座墊包上真皮及縫線，頭燈、後轆蓋等位置都各有Emporio Armani的徽號及字章。有齊ABS、前輪雙碟式制動、跳字式錶板、藍牙接駁手機功能，索價13000歐元，折合約港幣113,000元（據知香港售價約8萬餘）。MenClub問過幾位電單車友（包括Vespa用家），80%都話「好貴喎！」「唔抵喎！」，唔緊要，特別版，產量有限，只會喺全球部份巿場有售，實有人上釣。