EG年代的本田Civic，有所謂「細Tec」的130匹1.5公升直四VTEC版本，當年因為車輕，馬力大，雖然冇160匹的「大Tec」咁快，但始終平啲就係平啲，幫到唔少後生仔上車。廿多年後，無論係EG「大、細Tec」都仲有好多fans。

EG Civic雖然一把年紀，但仍深得不少MK人及本田fans愛戴，因為四輪雙搖臂獨立懸掛大經典喎

綜合各方消息，將於年內發表，來年初交車的新一代日本版Civic四門房車，將會以全新發展的1.5公升直四VTEC引擎主打。不過，時代唔同，一定要配Turbo，否則無法喺1500至5000rpm呢段區域提供至少20.7kgm的峰值扭力，最大馬力方面，將不少於150匹。

1.5公升直四Turbo VTEC引擎將於4月內發售的新Stepwgn使用，最大馬力為150匹，峰值扭力有待廠方公布

有來自日本車評人的消息指，新一代Civic的定位，除繼續針對務實作風的家庭用家，更會重投Civic在EG、EK年代的入門跑房車戰線，幫到鍾意揸車，又做咗老豆嘅型爸「上車」之餘，作為本田其中一款中堅車系，亦幫手為廠方「2020年度販賣800萬部」的目標「跑數」。

波箱方面，本土版一定有6前速手波版本。至於自動波版本方面，就必定是無段變速自動波箱（另附設7速手動轉波功能）。照咁睇，當年嘅1.6公升「大Tec」，就升呢變咗300匹有突嘅2.0T Civic Type R；咁「細Tec」呢？都仲係1.5公升，都好，仲係1500c.c.牌費，yea!!!