日前有保時捷Boxster車主喺隧道管道內壞車，之後懷疑因隧道公司職員未有在空波（N波）狀態下拖車，最終令波箱受損。

拖車過程雖然看似簡單，打個電話，技工一到，就可以兩手揈揈截的士鬆人。其實，車主有責任監察整個過程，並與技工溝通安排最適合的拖車方法。

一般而言，入N波，再以非驅動輪接地拖行方式拖車最普遍最穩陣，不過，當中仍有細節要留意

「N波」非最安全

以上提到的Boxster例子，必須轉入空波/N波，方能以後輪著地情況下拖行。假若車輛在故障後無法轉入空波（例如波箱電腦故障或車輛在發生碰撞後，傳統系統受損，傳動軸或車輛無法暢順地運行），必須先以附有俗稱「轆仔」的金屬架托起驅動軸（以Boxster的情況，即應托起後軸），然後以拖車拉走。咁究竟要唔要用「轆仔」拖車呢？可以參考你壞車前的車輛狀態，例如燃油顯示燈故障，因無油拋錨，而波箱（不論手波或自動波）亦一直運作正常，無唔識跳高波或轉低波，則可以在空波情況下拖行。倘若壞車前波箱（尤其自動波箱）已有故障，則建議你用「轆仔」拖車，因為波箱內的嚙合部份可能已有故障，即使已入空波，亦未必代表拖車過程中，波箱內的機械結構能有百分百能力維持著空波狀態。

如果壞車前自動波箱已有不正常反應，最好要求拖車公司以附有「轆仔」的金屬架拉走座駕，以免進一步損壞波箱

用「轆仔」有原因

部份私家車，可能因重量稍高、又或特殊設計，更可能因發生特定碰撞或機械故障後不宜以傳統拖車方式拉走，那就可能需要在四個車輪放「轆仔」，將整部車托起拉走。另外，有拖車公司亦會建議車身損毀嚴重的車輛，吊上平板拖車，然後載走。此舉可避免已損毀之車身部件在拉車過程中跌到路面，殃及其他車輛。不過，以「轆仔」金屬架輔助拖行，或以平板拖車載走的費用相對地較高，而拖車公司更可能因要花時間調動特別拖車，車主因而要多等一至數個小時，方能離開壞車現場。

咁鐘意部車，有必要喺部車精神爽利嘅日子，了解其拖車最佳方法，第時有故障，都唔洗咁驚青或做錯拖車形式決定

車主有責任

點都好，部車係你嘅，有必要在座駕精神爽利的日子清楚了解其拖車時需知，勿因天氣或壞車現場的混亂情況而心急選錯拖車方法，倘若受委托拖車的一方未能提供合適的拖車方法，車主應立即拒絕，並應尋找其他拖車公司，否則過後維修條數相當襟計。仲有，等待拖車「救援時」，應亮起「死火燈」，切勿站立或坐在公路，至少應該企在公路圍欄外的安全地帶，遇著尾隨車輛收制不及「追尾」，閣下都不會慘變杮餅。