現在大多數人買MINI，都會揀Cooper或Cooper S。原因係花得起，總想買部馬力大少少，裝備好少少，揸出街型仔少少嘅。所以，如果你一反常態，開口就話揀定MINI One，仲話One先至係最有MINI原創精神的話，咁請受小弟一拜，因為你真係識車，真係知道點先算係真正MINI。

你可能話：「黐線，買部22萬8嘅車仔之嘛，拜咩啫，呢條友癲㗎！」咁我會答你：「係㗎，我癲癲哋㗎！又厚多士，不過，如果你覺得One係好用，真係想請你多啲同朋友介紹。」

無論搬幾多理由放上枱都好，在香港這蚊型彈丸地，交通方便，鐵路四通八達，著實非必要養部車。這種觀點，一講就幾十年，講到合理得像太陽由東方昇起。如果咁合理，紅隧就不會朝朝有車龍啦，香港仔隧道出銅鑼灣就不會「長塞」加「間封」啦。養車的原動力，好多時並非愛車，理由往往是最簡單原始－「我唔想同啲死唔斷氣，自以為好靚兼冇停晒身家嘅八婆搭埋同一部地鐵。我唔想同啲長期鼻敏感，一『啤』佢就收手唔挖鼻屎嘅阿叔搭埋同一部巴士。我唔想坐啲一陣陣臭味嘅的士番工。仲有N個唔想N個唔願。」上述連串唔想，嚴格可以歸類為對生活的要求和態度，更可理解為lifestyle。

因此，養車對不少香港人來講，是維持個人生活態度的基礎，甚至是底線，其組成重要性就像牛油麵包（Bread & Butter），一定要有。「一早要同唔想見嘅人逼車番工，係會冇心機囉！」

如果只係求有部車，千挑萬選都未選到MINI One，MINI One價位對落的新車多不勝數。豐田Corolla啦（$169,820）、混能車Prius C啦（$213,962）、Fiesta 1.0（$149,900至$159,900），仲有德國車入門班霸Golf 1.4 TSI Trendline（$209,880），以及它它它，未能盡錄。但我認為，在眾多選擇之中，唯一在外型設計上見得大場面，又算得有品味的，只有MINI One及Golf 1.4。揀MINI One的，不會對Golf 1.4有感覺，反之亦然，咁講法，答案其實只有一個。

MINI One在巿區巿郊綜合測計耗油數字為4.9公升/100公里，以目前普通汽油每公升16.34元計算（未計算折扣優惠），每公里燃費只需8毫。就算巿區行車，燃費亦只是9.6毫（巿區5.9公升/100公里），假設當你「腳腳攞命」，$1.2一公里，好未？雖未至日本混能車如吸風飲露的低耗油表現，但以操控頗有趣味的小車而言，MINI One算是頗慳油的一員。

今代MINI One採用1.2公升（1198c.c.）直三汽缸Turbo引擎，小容積三個汽缸加Turbo，在近期歐洲車界大行其道，連寶馬跑車新貴都採用。這台引擎擺明不是追求大馬力輸出，因為最大馬力只有102匹/4250-6000rpm，比豐田Corolla還要少，但我鼓勵大家在往後睇新車規格表時多留意峰值扭力輸出一欄（尤其是歐洲車），因為這是決定靜止起步至中段加速的反應。MINI One的峰值扭力為18.4kgm，早於1400已輸出，並持續供應至4000rpm，有相當廣濶的動力黃金段落。

我由寶馬荃灣維修中心，經荃錦公路往元朗，在朗逸峰、槍會及川龍一帶的長命斜，MINI One的扭力都相當充沛，我以D波上斜，千餘兩千轉已夠輕鬆爬坡，無需像上代MINI One（當時配1.6公升直四自然吸氣引擎），需要經常kickdown，讓引擎維持在動力輸出最爽快的段落。將波棍啪去左面S波，表現生猛不少，儘管三波較長氣，但在上斜的車龍中且放且留最派用。轉去手動模式（軚盤不設加減波撥片），轉波反應不算快，但勝在夠順夠滑，落山快跑拖波最好預留多一點距離，制動力不算強，但制動衰減力現象不算明顯。隨車配搭的韓泰（Hankook）Kinetic Eco 175/65 R15輪胎擺明sell慳油，寧靜度同輪胎自身的早段緩震表現平平，快跑彎路的tyre slip情況幾明顯。無緊要，用舊之後換套石橋GR 100。

MINI One車輕，按德國工業標準只有1090kg（歐盟標準亦只是1165kg），雖然最大馬力不高，但勝在峰值扭力夠廣，出彎與跑斜路總算幾好力。今代MINI採用電力輔助轉向系統，turn-in入彎扭軚時總覺未夠線性，扭動軚盤時發力一剎總覺得有點輕，軚感稍嫌模糊，不過，當再扭深一點，回饋力就回復合比例水平，這一點，要識應，尤其在彎路快揸。

車廂方面，MINI One向來不賣弄精緻閃亮的電鍍飾件，暗啞滑溜的黑性耐用塑料部件，就是一心sell simplicity，日本MINI用家最like，香港呢？始乎還未成氣候，但已見到愈來愈多年青的「識貨之人」。平心而論，今代MINI One其實已比上代光鮮精緻，例如有碳纖影子的手套廂蓋及儀錶板旁的飾板，布座的幻彩縫線，以及皮質波棍頭及波棍套。我對這類廿萬頭歐洲小車子的裝潢要求向來不高，MINI One現時的配搭，算幾吸引。嫌齋？仲有15項option可以加。

MINI One Automatic規格

售價：$228,800

代理：MINI HK http://www.minihk.com

車型：三門掀背四座

體積：（長）3821mm x （闊 ）1727mm x （高）1414mm

軸距：2495mm

引擎：1198c.c. 直列3汽缸Turbo

馬力：102匹/4250-6000rpm

扭力：18.4kgm/1400-4000rpm

波箱：6前速自動附手動轉波功能

懸掛：（前）麥花臣支柱；（後）多連桿

制動：（前）透氣碟；（後 ）實心碟

車重：1090kg

加速：0至100km/h加速10.2秒（六前速手波版9.9秒）

極速：195km/h

耗油：4.9l/100km（巿區巿郊耗油測計模式）

輪胎：Hankook Kinetic Eco 175/65 R15