豐田（Toyota）已有一段長時期，冇用「Toyota」品牌喺日本推出SUV喇。 

講咗好耐嘅新一代HiLux同「大facelift」嘅Land Cruiser Prado，日前正式喺日本國內發表，HiLux更加係2013年喺日本停售重返本國巿場，至於第三響，當然係講快將停產嘅FJ Cruiser，臨別之際，豐田推出棕色車身嘅FJ Cruiser「Final Edition」。

先講句唔好意思，因為HiLux只有柴油引擎版本，香港嘅HiLux迷只能「睇圖齋J」，有心想買到冇偈嘞。日版HiLux配2.4公升直四柴油Turbo引擎，「「孖屋」（Double Cab）五座位，最大馬力150匹/3400rpm，峰值扭力40.8kgm/1600rpm-2000rpm，6前速自動波，耗油量每公升可以行到11.8km。唉！幾慳油都冇用，冇得嚟香港吖。

豐田幾刻意將HiLux包裝成潮人汽車發售，淨係睇幾張廠方宣傳圖片就知，有長腿，又喺類似涉谷或表參道名店門口取景，即係想講你聽，HiLux唔係淨可以「轆沙灘」或「擒山」囉。

HiLux分兩個級別，X同Z版，其中X版可以配手動調校冷氣系統、布座椅同內櫳、仲有鋼鑄輪圈（又稱「鐵皮軨」），加埋Super White II車身顏色，頂你，好raw好正呀喂。

Land Cruiser Prado今次大facelift主要係改動鬼面罩式樣及新增安全及自動泊車設備。Land Cruiser Prado有柴油電油兩款引擎，柴油就……唉！唔講喇，電油版本配編號2TR-FE系列2.7公升直四自然吸氣引擎，已往曾經用凌志RX 270，屬長衝程（95mm）設計，最大馬力163匹/5200rpm，峰值扭力25.1kgm/3900rpm，6前速自動波箱，每公升汽油可以行9公里，慳油就唔算㗎喇，不過以2100kg水平而言，咁嘅食量，你仲想點？

至於臨別要秋秋波波嘅FJ Cruiser，打正名堂Final Edition，唔買就以後咪苦瓜乾咁嘅面次次Morning Drive喺庶呻笨，349萬日圓，棕色車身，4公升6缸偈，一個specs。

真係最後，的確最後，賣埋呢批，最後一批，啱就埋嚟！