Photos: Toyota Japan

日本車fans，又或經常去日本嘅巴打，可能都會問過以下兩個問題。

「點解有啲日本舊車、日本的士嘅門邊鏡，安裝喺右手邊車頭沙板？」

「點解而家啲日本車，將門邊鏡改咗喺A柱基部與車門接壤嘅三角區域？」

Toyota新世代日本的士將於今年較後時間正式發表及投入服務

咁就長篇喇，希望你唔介意睇睇。

二次大戰後，日本早期售賣嘅汽車，大部份都係由外國進口，例如英國嘅柯士甸（Austin）或希路敏（Hillman）品牌，呢啲車去到日本，都配備「沙板鏡」，約定俗成，五十年代末至六十年代初湧現嘅日本品牌汽車，都採用「沙板鏡」。

而當時日本嘅運輸省，亦要求所有日本發售嘅嘅全新乘用車，必須配備「沙板鏡」（受車型或佈局者例外），但當時法例冇限制用家，由「沙板鏡」改成「門邊鏡」。

1972年Toyota Corolla Levin

踏入70年代末，日本車喺海外巿場愈來愈受歡迎，美國認為「沙板鏡」屬於「非關稅貿易璧壘（Non-tariff barriers to trade，NTB），影響美國車喺日本巿場嘅銷售表現，於是向日方提出抗議。日本最後妥協，喺1983年3月宣佈取消「強制沙板鏡」嘅法例。從此，日本陸續出現大量「門邊鏡」新車，日產喺1984年率先推出電動摺合門邊鏡。

1982年Toyota Celica XX

1973年出戰日本富士1000km長途賽嘅Celica LB賽車，都係配「沙板鏡」

不過，好多日本的士司機或用家，因為習慣使用「沙板鏡」，於是喺購車後自行改裝。據一啲資深日本行家同日本的士司機指，「沙板鏡」優點在於盲點較少、「望鏡」時「分心」程度相對低，亦因「沙板鏡」覆蓋角度較廣，喺駛過窄路時更容易察看有否過於貼近硬物或路人。

香港代理喺年多前已宣布豐田新一代的士會輸港，當然，配沙板鏡嘅機會好細

 日本國內亦有唔少關注行人權益嘅組織指：「沙板鏡」係過時同唔安全嘅設計，尤其喺城巿交通意外，往往就係行人殺手，容易傷及行人頭部或頸部。 

都係嗰句，揸車專心啲，過馬路，唔好聽「MP三」或玩手機。