POSTED ON 05 Dec 2016
Photos: gazoo.com 時間呢樣嘢,總係過得好快。 豐田日本汽車生活網站gazoo.com,喺上月底舉行嘅Toyota Gazoo Racing Festival 2016活動,訪問咗好多揸八、九十年代豐田跑車、Sports Sedan嘅車主,部份車主原來都幾長情,固然係忠心不二嘅豐田躉,更加係「零手新車買揸到而家」,雖然話「酒香有特色,飲開有感情」,但係……唔會悶嘅咩? |
|
其中一位出席活動嘅Altezza車主林幸太郎先生同gazoo.com嘅小記講,當年佢知道豐田將會推出Altezza嗰刻,已經決定要買一部,因為Altezza嘅前置引擎、後驅(FR)佈局同Sports Sedan嘅定位,正正係佢想要嘅嘢,林先生原來都係Celica GT-FOUR同AE 86嘅車主,哦!咁豐田粉,養多部Altezza都好正常啫。 林先生呢部Altezza係1999年製造,屬RS級別,配兩公升直四自然吸氣引擎,最大馬力210匹,峰值扭力22kgm。外形大致上仲保留住原裝車味道,但佢加裝其他品牌嘅擾流組件,裙腳、門邊鏡、頭尾泵把。明白嘅,成廿年唔換吓個look,邊有可能,小改怡情嘛。 |
|
買得Altezza,一定會去飛吓,更可能玩吓Drift,否則嘥咗咁靚嘅FR底盤啦!林先生冇大改,只係加咗張桶型座椅同來自其他品牌嘅制動系統,佢話:「引擎我唔郁佢喇,原裝setting算,但我換咗機械式限滑差速器(LSD)。另外,尾牙由4.1加大到4.8,咁低轉同中段嘅加速表現就好好多,淨係改吓驅動部分,唔搞引擎,所以部車咪咁襟用囉!」 | |
林先生除咗落吓Trackday,亦有參加日本Altezza車主會嘅屬會ADC,哦!原來即係Altezza Drift Club,幾好喎,大家都係揸Altezza,一齊甩,有時又出席豐田嘅大型活動,真係戥佢開心,勁羡慕日本車迷有咁多地方玩。展望將來,佢話會繼續Keep好部Altezza,啱喇!Altezza呢啲好車,真係有今生,冇來世,賣咗就買唔番㗎喇喇喇喇喇喇喇喇喇!!!!! | |
林先生位公子原來已經係高中生,老豆話等阿仔夠歲拎埋車牌就一齊出車。聽到都覺得正,男人唔一定話要擁有幾多部車先叫喺汽車生活有成就,能夠見證自己仔女「接班」,揸住自己愛車喺飄移活動「Bell右又Bell左」,嗰份滿足感都係好鬼「Perfect池」㗎! | |
日本喺2001至2005年曾舉辦Altezza系列賽 |