天氣又濕又熱，無理由唔開冷氣，但得罪講句，好多男車主部車，冷氣都有不同程度嘅噏味，好多人以為放多幾個香精座就搞掂，實情未有認真清潔臭味源頭。

第1招：熱風驅濕驅霉

冷氣系統運行時，對流空氣會將衣服及身體的濕氣（包括汗液），一併捲入冷氣管道內，久而久之，管道內的濕氣就會積聚霉菌及發出異味。如果異味的濃烈程度未算強烈（咁要搵個抵諗嘅friend嗦一嗦），可以先你關上車窗及天窗，啟動暖氣（車上所有人落車），循序漸進地提高溫度（十分鐘內由微暖加至最暖），連續開動約二十分鐘，試圖以熱風揮發管道內濕氣及輕度驅散臭味。

第2招：壓縮清潔劑洗管道

假若情況未有好轉，可到汽車用品店，購買冷氣送風管道的壓縮氣清潔劑（售價由40元至120元不等）自行噴洗。

百零二百蚊，有限錢，嘭嘭聲快啲換

唔係誇張，大部份汽車冷氣過濾網都勁污槽，唔怪得你同你啲細路一上車就咳到死吓死吓

第3招：勤換冷氣過濾網

如果情況嚴重，應自行或找師傅檢查前座乘客位手套箱後方的車廂空氣過濾網（大部份車齡在15年以內的歐、日品牌汽車，都設有針對花粉症及提高車廂空氣潔淨度的空氣過濾網），過濾網位處蒸發器附近，經常面對又濕又熱的空氣，如果無定期更換（售價由百多元至數百元不等，視乎大小尺碼），自然變成藏污納垢的「黑色口罩」，吸多N次純氧都補唔番。

最佳嘅「曬車」方法，當然係打開窗同車門啦

第4招：暴曬驅濕氣

長遠而言，應該養成定時（可以每星期一次）「曬車」嘅習慣，趁有猛烈陽光的正午，開車到乾爽的空地，打開所有車窗及車門，搬走行李廂、手套廂的雜物，將座駕暴曬30至45分鐘，透過高熱驅除車廂內的濕氣及霉味。

第5招：引熱空氣驅氣閘霉味

完成上述步驟，可以將車廂空氣對流循環模式，撥到非循環，一方面驅走困在車廂多時的污濁空氣，亦畀機會讓新鮮的熱空氣穿過又黑又濕的氣閘，有助驅走霉味。更徹底的是，在夏季至少每一個月清洗汽車地氈，避免因地氈纖維積聚由鞋底帶進車廂的污水（尤其是你經常去海灘或街巿買餸）。