近五年，末代（993）及「尾二」（964）氣冷保時捷911的易手價快速飈升，當中又以棍波版最吃香，目前高質素的964 Carrera 2棍波版成交價接近65萬，而盤源相對地多的993 Carrera（Tiptronic版本），售價亦接近40多萬，以一部車齡超過20年的「老爺車」而言，售價絕對稱得上硬淨。如果再話你知，擁有賽車血統的993 Carrera RS 3.8叫價300萬；專攻長途耐力賽的993 GT2成交650萬，你可能會話：「咩事啊依家！」

[Youtube]http://youtu.be/pg4M9PDfKoE[/Youtube]

時下乜都炒得一大餐，有乜出奇，更何況996之前的氣冷911易手巿場一直炒味甚濃，事實上，964及993易手價急升乃全球現象，撇除純炒賣因素，好大程度與氣冷911的特色有密切關係。有從事經典車貿易的業界人士表示：「而家啲波子太易揸，畀唔番以前嗰種考你技術嘅感覺，964同993誕生之時，剛好在汽車高度電子化之前，襟用，易整，又好feel，自然多人搵。」

如果你肯出四、五十萬買部二十多年車齡的911，好大理由相信你絕非年青小伙子，極有機會是三十到尾或四十過外的資深車迷，見過當年簇新的964或993有幾吸引及巴閉。

今次慷慨借出964及993的MenClub讀者Anson，細細個已經係車迷。他首部保時捷絕非young classic，而是997型911。「都係鐘意964同993個樣多啲。」Anson表示，買964同993之前，已在玩車的朋友圈子做了相當時間的資料搜集。「我鐘意揸棍波，好多人以為難搵棍波964，其實香港仲有唔少，亦有相當數量被玩家『收埋咗』，要有耐性。」

我問：「咁多唔多人收埋棍波993？」Anson話993棍波難搵得多，因為保時捷推出993之時正積極推廣Tiptronic自動波箱，「唔洗踩Clutch，揸住支棍波推推拉拉就轉到波」，而且香港人鐘意舒服，大部份買家都揀Tipronic，留到今日的棍波，少之又少。要提一段香港行貨993的小插曲，話說當年棍波版993近乎「冇人吼」，為數10部的1994年度棍波Carrera 2放售兩年無人問津，代理最終在1996年想出以加送RS版擾流部件才成功促銷。

Anson認為993同964的駕駛席佈局及坐感大致相同，我則覺得993舒服得多，儘管三個踏板仍有「偏左」情況，但總覺得上半身伸展空間零舍充足，而且993車廂線條都比964柔順，少了一份「古董911」的老氣和硬繃 ，整個車箱氣氛輕鬆得多，真正稱得上有90年代跑車的時代感（編按：「時代感」呢三個字都leung爆啊！）。

氣冷911雖未至「白粉丸仔索K」般令人上癮，但Anson話玩過993，便對那個年代的911愈有好感，不自覺「追落去」，買埋964。雖說在香港買部棍波964比993容易，但只是相對而言，好不容易終於遇上他今次借出拍攝的深藍色964，「洽購時知道係『 零手車』，首任車主持有超過20年，後來因為轉玩Boxster賣盤。」該位車主二十多年來堅持光顧總代理捷成汽車的維修部，所以整部車的保養水準十分高，無論是底盤、門板、車身都無明顯雜聲，推拉波棍時的阻力及嚙合檔位的緊緻程度，絕不似是「二十有幾」的「老爺波子」，即使你嫌我誇張，我都要講，揸落最多似係三幾年的歐洲新車，「搞乜㗎，呢個Anson點解咁鬼好彩挖到呢啲超筍盤！！」

Anson話：「都唔係啊！司機位椅套（座墊部份）爛咗，本來打算上網搵張相同顏色嘅『易手』，但顏色實在太冷門，唔易搵，就算向總廠訂張全新，左右兩張相差廿幾年，實唔對色，算啦，暫時由得佢。另外，我亦更換車門鈎扣之間的白色塑膠，嗰嚿膠耐咗就會爆裂，一定要換。」另外，未知是否近月天氣寒冷關係，引擎漏油情況漸趨明顯，Anson話：「要嘞！係時候大修引擎！」

Anson話好支持MenClub多搞經典汽車特輯，筆者因此可以盡情測試。整體來講，無論從外型及操縱質感，964仍有相當濃烈的930味道（例如波檔閘的推拉摩擦感，鬆離合器時的踏感），再加上一本正經的中控台，霎時有回到八十年代初期德國跑車車廂的錯覺。不過，當快揸過之後，漸漸覺得964易上手，即使以今日汽車的標準而言，仍算user-friendly，底盤及車體的剛性亦明顯比930高，出彎動態比930靈巧順暢。

至於993，我最欣賞其末代氣冷水平對向六汽缸引擎，暢滑程度比964有長足進步。一腳大油，引擎轉速由怠速輕鬆衝上六、七千轉，而最討人喜愛的，是993廣闊的扭力帶，從來無需刻意大幅提高轉數，已有豐富的扭力，加上機械感十足的氣冷引擎吸索聲，就似駕駛被高度現代化的老爺跑車，有少少時空交錯，感覺好獨特。

＿！我好似中咗毒，仲要係入血嗰種，金翅大鑊鳥！！